Vastelaovendj minse van Itter,
Waat bèn ich trots det ich veurop móch gaon tiedes ut vastelaovendj seizoen 2024. Wae zeen der vol veur gegange, höbbe der enorm van genote en waat höbbe wae eine sjoeane tied gadj same. In plaats van al die sjoean activiteite nao te loupe wil ich inkele minse bie deze nog ins extra bedanke:
Mien Prinses Anita en ós kinjer Tess en Femke – Adjudante Sjaak en Bjorn – De Waltons – De Raod van Èlf – Vorst Roland – Jeugdprins Sem en Jeugdprinses Dayli. En den moog ich natuurlik ouch zeker neet vergaete; uch, de minse van Itter!
Sjoean óm zóveul minse edere daag weer op de bein te zeen mèt de vastelaovendj in Itter. Mer óm dit meugelik te make zeen der ouch veul minse die häöre vrieje tied besteeje óm eder jaor weer dit fieëst en alles der óm haer te organisere. Det waardere wae enorm, DANKE!
Blieftj de vereiniginge steune en blief actief deilnumme aan de activiteite in ós Itter, allein zoea blieftj de samelaeving in Itter bestaon. Minse wae mótte der mèt zien alle same get van make en dao is ederein hel bie nuëdig. Lètj good op ein!
Wae winse ut Prinse gevolg van deze vastelaovendj Prins Wim mèt zien Prinses Nicole, Prinses Sofie, Adjudante Elin en Lizzy eine geweldige tied same. Veur de lètste kieër ónger mien motto:
“Neet lang dinke, wae gaon der same eine drinke”
