Beste Walvaegers en Walvaegsters,
Ut zeen ónwerkelijke tieje. Het Corona virus zurgtj nog steeds veur maotregele woeadoor we dök neet kinne doon en mét elkaar om kinne gaon wie det we gewindj woore. Wie ieërder aangegaeve, höbbe wae de afgelaupe periode aafgewachtj om te kieke waat de situatie en maotregele omtrent COVID19 zeen. Óm ein zoea good meugelijke beslissing te numme voor ut aanstaondje seizoen.
Vastelaovendj is ein fieëst van same zeen en verbinjing, óngedwonge en plezeer veur jónk en aod. Mer det weurdj ós hieël lestig gemaaktj in deze situatie. Wae als bestuur van VV de Walvaegers höbbe doarom motte besloete óm tot nader order alle vastelaovesactiviteite, georganiseerdj door de vereiniging, neet door te laote gaon. Wae wille niks lever den vastelaovendj in Itter, same mét de minse, oetdrage. Mer wae vinje det gezóndjheid en veiligheid veurop staon. Zoeëlang de beperkendje maotregele door COVID19 nog van kracht zeen, en den zeker de 1,5-maeter-regel, zeen wae gein meugelikheid óm ós activiteite op ’n verantjwoordje meneer door te laote gaon.
Det beteikentj dus ouch det d’r dit jaor geine Prins en Jeugdprins en –prinses zal zeen óm veurop in de vastelaovendj te gaon. Wae vinje det wae ’t aan ós Prinsepaare verplichtj zeen óm ze een volwaardig sezoen aan te beeje, van Prinsebal tot Aswoonsdig. Helaas geit det neet lúkke mét de huidige situatie en maotregele van ut RIVM.
Wae hope det gae begrip höbjt veur dees moeilijke keus. Wae zulle uch op de huuëgdje hoaje euver eventuele óntwikkelinge. Blief in de tössetied gezondj en lét op elkaar. Alaaf!
Bestuur VV De Walvaegers